POČETAK ADVENTA.
Kategorija: OGULIN
Snoć smo zapalili prvu adventsku sviču. Grad nam okićen kaj i lani, al' da se ukrasila i ka druga cestica, ne bi bilo loše. A i ne bi to baš puno koštalo. Samo malo dobre volje. A morda bi i izloge i bertije mogli gazde malo uredit. Da nam svim, bude lipše.
Inače, u parku i oko njega, lampic kulko voliš. Po svakem drvetu. Kaj i lani, Jose „Milicajac“ i njegovi dečki, zbrivadu da ki kaj ne ukrade. Kad moredu prinam naveliko krast ministri, državni tajniki, doktori, more onda bogme i sirotinja skinit ku lampicu s lipe ili kostanja, pa metnit na bor doma. Al Jose gadan. Neda. Pa sirotinja ljuta na njega. A čovik, ki je Grumfekov neslužbeni bodyguard, samo dela svoj posal. Jer da ga ni, mi kakovi jesmo, odnesli bi ne samo par žaruljic, vengo i cel kostanj.
Došlo nam vrime Došašća. Tako smo ga prvlje zvali. Da je pred 50 godin ki rekal da je došal Advent, niki ga razumil ne bi. Ni teta Roze, ni strina Bare, ni tetac Mije ……. niki. Ne bi ga razumili ne bi ni u Žegaru, ni u Lomostu, ni u Vučići, ni na Prapuća.
A sada imamo Advent. Isto kaj Došašće, al malkoca modernije. Tako velidu, celi svit divani. Ja sam se, kad sam bil mal, veselil Došašću, jer je bil Božić blizu. I bilo je svega – i pečenja i kolači. Kulko voliš. Samo mi nikako ni pasalo, kaj sam se moral dizat na sabajle, već prije šeste vure, i pojt na mašu zornicu. A vani zima. Sriž na okni, i snig do kolena. Pa črez prtinu, va crikvu. A u crikvi, meni onako maćemu, zima. Niki ne loži. A svi pivadu: „Oj Marijo ti sjajna zornice“. Samo sam tu pismu zapamtil.
I svi smo se, onako u tišini i u miru, spremali za Božić, kad će dojti mali Isus. Tako je bilo prvlje. A onda, kad smo dobili državu, za ku velidu da je nima ni lipše ni bolje na celem svitu, počel je talambas. Upeljali iz Merike ništo novo, i mesto Došašće, sad svi divanidu - Advent. Pa svi se veselidu i pivaju kaj na svadbi. Samo čekam da se počnu kitice dilit i muzikašimi eure u armoniku rivat. Na sve strane nudidu nam kolače svake fele, fritule skupe koda su ih u Esplaadi il' Sheratonu delali, kuvano vino i a niki se zabuni, pa zeme i čaj. Sada, ne bi ja til lagat, al meni je ovo sad nikako bolje. Življe i veselije. A niki opet velidu, kako ni vrime za velike fešte.
Ali, sinoć se to nije pokazalo. Fešta je bila prava. Prostor između crkve i Cesarovca, bio pun ko čep. Grupa Dalmatino na visini zadatka. Atmosfera za čistu peticu. Tko je birao, izabrao je dobro. A Grad se kao i prošlog Adventa dobro isprsio. Lani smo imali Danijelu, Cveka, Belana i Gulijana, a ove godine, opet cijenjena glazbena imena. Dakle, za ovaj je Advent, netko je opet malo dublje posegnuo u „gradsku kesu“. Kapa dolje. Za ogulinske pojmove, angažirana je također dobra glazbena ekipa hrvatskih pjevača – uz Dalmatino, tu su u narednim tjednima Hari Rončević, Dino Petrić i Matija Cvek, uz iznimno bogat program lokalnih snaga.
Cjelokupni program Adventa možete vidjeti i na:
Sličice posudio sa Ogulin.eu. Hvala im.
30. 11. 2025.
Nebojša Magdić